មេរៀនទី៦ ភ្នែក
មនុស្សគ្រប់រូបមានវិញ្ញាណប្រាំ ។ ភ្នែកជាវិញ្ញាណមួយក្នុងចំណោមវិញ្ញាណទាំងប្រាំនោះ ។ មនុស្សអាចមើលអ្វីៗឃើញដោយសារភ្នែក ។ ដូចនេះយើងត្រូវយល់ដឹងអំពីៈ
1. រូបផ្តុំភ្នែក
ផ្នែកក្រៅនៃភ្នែកមាន ចិញ្ចើម ត្របកភ្នែកលើ ត្របកភ្នែកក្រោម និងរោមភ្នែក ។
ផ្នែកខាងក្នុងនៃភ្នែកមានគ្រាប់ភ្នែកដែលមាន រន្ធប្រស្រី កែវភ្នែក ប្រស្រីខ្មៅ រេទីន និងចក្ខុប្រសាទ ។
2. នាទីរបស់ភ្នែក
ភ្នែកមាននាទីសម្រាប់មើល ។ យើងអាចឃើញវត្ថុអ្វីមួយ នៅពេលរូបនៃវត្ថុនោះចូលតាមរន្ធប្រស្រីឆ្លងតាមកែវភ្នែក ។ រូបនោះទៅប៉ះនឹងរេទីន
ហើយបញ្ជូនទៅដល់ខួរក្បាលតាមចក្ខុប្រសាទ ។ ដោយភ្នែកមានសរសៃប្រសាទគេហៅភ្នែកថា ចក្ខុវិញ្ញាណ ។ ចំណែកចិញ្ចើម ត្របកភ្នែកលើ ត្របកភ្នែកក្រោម និងរោមភ្នែកមាននាទីសម្រាប់ជួយការពារគ្រាប់ភ្នែក ។
ពេលខ្លះភ្នែកក៏អាចមើលឃើញច្រឡំដែរ ដូចក្នុងករណីខាងលើ យើងឃើញថាគម្លាតនៃបន្ទាត់ទាំង 4 មានប្រវែងស្មើៗគ្នា ប៉ុន្តែក្រោយពេលគូបន្ទាត់ទ្រេតក្នុងលំនាំផ្ទុយគ្នារួចមក
បន្ទាត់ទាំងអស់នោះហាក់ដូចជាកោងហើយអាចនឹងជួបគ្នានៅកន្លែងណាមួយទៅវិញ ។
3. ជំងឺភ្នែក
តើភ្នែកច្រើនកើតមានជំងឺអ្វីខ្លះ? ភ្នែកយើងច្រើនកើតជំងឺៈ
ភ្នែកក្រហម
ភ្នែកពពែឆ្កែ
ភ្នែកឡើងបាយ
ភ្នែកច្រើនកើតជំងឺ ពពែឆ្កែ ភ្នែកក្រហម អៀភ្នែក ខ្វាក់មាន់ ស្រវាំងភ្នែក(មីញ៉ូប) ភ្នែកឡើងបាយ ដុះកន្ទុយថ្លែន... ។ ជំងឺទាំងនេះកើតឡើងដោយសារខ្វះអនាម័យ ការបរិភោគអាហារខ្វះជីវជាតិ
ការខ្វះការប្រុងប្រយ័ត្នក្នុងការប្រើប្រាស់សម្ភារៈ ការមិនយល់ពីរបៀបអាន... ។
4. អនាម័យភ្នែក
តើយើងត្រូវថែរក្សាភ្នែកដោយធ្វើដូចម្តេចខ្លះ?
ភ្នែកមានសារៈសំខាន់ណាស់សម្រាប់ជីវិតយើង ។
ដូចនេះយើងៈ
ត្រូវបរិភោគអាហារណាដែលសម្បូរជីវជាតិ (A) ដូចជា ការ៉ុត ដំឡូង ល្ពៅ ចន្លែ (ស្ពៃ ស្លឹកងុប ស្លឹកម្រះ...)ល្ហុង...។
ត្រូវទៅមន្ទីពេទ្យដើម្បីឲ្យគ្រូពេទ្យពិនិត្យនិងព្យាបាលជាបន្ទាន់ នៅពេលភ្នែកប៉ះនិងវត្ថុផ្សេងៗឬវត្ថុផ្សេងៗចូលភ្នែក ឬភ្នែកមានបញ្ហាផ្សេងៗ ។
ត្រូវធ្វើការ ឬមើលសៀវភៅក្រោមពន្លឺគ្រប់គ្រាន់ក្នុងចម្ងាយ 25cm ពីភ្នែក ។ មិនត្រូវមើលចំព្រះអាទិត្យនិងមិនត្រូវអានសៀវភៅនៅពេលជិះកង់ ម៉ូតូ រថយន្ត... ទេ ។
មិនត្រូវយកដៃកខ្វក់ជូតភ្នែក និងយកវត្ថុស្រួចៗដាក់ជិតភ្នែក ។ ត្រូវឲ្យភ្នែកសម្រាកក្រោយពេលអាន ឬមើលអ្វីៗអស់រយៈពេលច្រើនម៉ោង ។
មេរៀនសង្ខេប
ភ្នែកមានត្របកភ្នែកលើ ត្របកភ្នែកក្រោម និងគ្រាប់ភ្នែក ។ គ្រាប់ភ្នែកមានកញ្ចក់ភ្នែក ប្រស្រី រន្ធប្រស្រី កេវភ្នែក រេទីន និងចក្ខុប្រសាទ ។
ភ្នែកមានតួនាទីសម្រាប់មើល ។ សរីរាង្គវិញ្ញាណសម្រាប់មើលហៅចា ចក្ខុវិញ្ញាណ ។ ភ្នែកមាននាទីសំខាន់ណាស់ ដូចនេះយើងត្រូវថែរក្សាការពារវាឲ្យបានល្អ ។
ពេលភ្នែកមានបញ្ហាចាំបាច់ត្រូវទៅមន្ទីរពេទ្យឲ្យគ្រូពេទ្យពិនិត្យនិងព្យាបាលជាបន្ទាន់ ។
សំណួរ
ក. ចូរឆ្លើយសំណួរខាងក្រោមនេះ ។
- 1. តើភ្នែកមនុស្សចែកជាប៉ុន្មានផ្នែក? អ្វីខ្លះ?
- 2. ចូរអ្នករៀបរាប់ពីវិធីការពារភ្នែក?
- 3. តើសរីរាង្គវិញ្ញាណអ្វីសម្រាប់មើល?
- 4. តើគ្រាប់ភ្នែកមានអ្វីខ្លះ?
ខ. ចូរជ្រើរើសចម្លើយដែលត្រឹមត្រូវ
ការងារស្រាវជ្រាវ
- 1. តើគ្រាប់ភ្នែកធ្វើចលនាដូចម្តេច? ដោយសារអ្វី?
- 2. ចូរបង្ហាញពីនាទីរបស់ចិញ្ចើម ត្របកភ្នែក និងរោមភ្នែក ។